Олунньу 21 күнүгэр дойдуга биэлсэр күнэ бэлиэтэнэр
Опубликовано: 21.02.2022 в 12:59

Бу уустук идэлээх дьон суһал көмөҕө, тыа сирдэригэр биэлсэр-акушер пууннарыгар, араас тэрилтэлэр быраас иннинээҕи оҥоһуллар суһал көмө кабинеттарыгар үлэлииллэр-хамныыллар.

Оттон тыа сиригэр олорон үлэлиир биэлсэр эппиэтинэһэ хас эмэ бүк. Нэһилиэгин дьонун доруобуйата киниттэн быһаччы тутулуктаах. Сэлиэнньэҕэ доруобуйатынан моһуогурбут киһи, биллэн турар, бастаан биэлсэригэр көрдөрүнэ тиийэр.

Тыһыынчаттан тахса нэһилиэнньэлээх Ымыйахтаах сэлиэнньэтигэр 8 үлэһиттээх врачебнай амбулаторияҕа биэлсэринэн 2020 сыллаахтан Елена Егоровна Петрова үлэлиир. кини бэйэтэ үрүҥ халааттаах аанньал буолар баҕалаах 2007 сыллаахтан бу эйгэҕэ киирбит.

Биэлсэр идэтэ «универсальнай» буолан, Елена Егоровна оҕолору көрүүттэн, патронажка сылдьыыттан саҕалаан улахан дьон эчэйдэхтэринэ, ыарыйдахтарына бастакы көмөнү оҥорор.

Быраас коллегатын кытта нэдиэлэнэн атастаһа сылдьан вызовтарга тиийэр буолан, «үлэм арыый да сынньалаҥ соҕус» диэн кэпсиир. Ол эрэн биэлсэр үлэтэ олус эппиэтинэстээх, ыксаллаах да түгэннэр буолан ылаллар буоллаҕа. Оннук биир түгэнин маннык ахтар: «Ааспыт сайын дэриэбинэбэр соҕотох үлэлии хааллым. Биир оннук күн киэһэ оҕолорбун кытта дьиэбэр олордубут. Чаас да ыраатта. Арай суһал вызов киирдэ. Оҕолорбун ханна хайдах гыныахпын билбэтим. Улахан убайбыт лааҕырга, аҕабыт ыраах үлэтигэр бааллар. Олох ыксал буолла. онтон оҕолорбун таҥыннартаан баран, тэйиччи кэргэним дьонугар илтим уонна вызовпар ойдум. Хата, сып-сап хамсанан, улаханнык ыалдьыбыт чүөчэбин өрүһүйэн бары да өрө тыыммыппыт».

Бэйэтин коллегаларыгар чэгиэн-чэбдик доруобуйаны, сыралаах уустук үлэлэригэр элбэх махталлаах пациеннары, тус олохторугар дьолу-соргуну баҕарар.

 

#Намнааҕыкиинбалыыһа #НамскаяЦРБ #фельдшер #деньфельдшера #биэлсэр

Решаем вместе
Не смогли записаться к врачу?