Муус аннынан балыктааһын
Опубликовано: 05.04.2022 в 09:58

Тымныы тыйыс кыһыммытын атааран, сандал саас салаллан кэлиитин көрсө дьон-сэргэ сибиэһэй салгыҥҥа таһырдьа тардыһар, тыаҕа дьулуһар. Нам улууһун киин балыыһатын үлэһиттэрэ үлэлэриттэн быыс-арыт булан, муус устар 2 күнүгэр идэлээх сойуустара уонна суһал көмө салаата тэрийбит муус аннынан балыктааһын күрэҕэр көхтөөх кыттыыны ыллылар.

Отделениелар үлэһиттэрэ ох курдук оҥостон өрүскэ муһуннулар. Уопсайа 8 хамаанда киирдэ: администрация, киин поликлиника, терапевтическай, суһал көмө, приемнай отделениелара, хирургическай уонна реанимационнай көмө үлэһиттэрэ, Хатырыктааҕы врачебнай амбулатория.

Күрэх хамаандалар парадтаан киирэн бэйэлэрин билсиһиннэрии түһүмэҕинэн саҕаланна. Кыттыылаахтары киин балыыһа кылаабынай бырааһа Ариан Николаевич уонна идэлээх сойуус председателэ Нюргуяна Ивановна киирии тыл этэн, эҕэрдэлээн, кыайыыга алҕаан арыйдылар. Хамаандалар хапытааннара күрэхтэһии былааҕын гимн доҕуһуоллаах көтөхтүлэр. Дьүүллүүр сүбэ чилиэннэрин тута миэстэтигэр күрэҕи көрө кэлбит ыҥырыылаах суһал көмө ветераннарын Илья Васильевич Еремеевы уонна Петр Гаврильевич Сергучеву таллылар.

«Бастакы балык» уонна «Саамай улахан балык» диэн күрэххэ терапевтическай көмө үлэһиттэрэ иннилэрин биэрбэтилэр, бастакы күөҥҥэ таҕыстылар.

Эрдэттэн дьиэҕэ үлэ бэриллибитэ —  «Дьикти оҥоһуулаах балык» диэн илии матырыйаалыттан оҥоһук оҥоруута. Бу түһүмэххэ: I м. – хирургическай көмө хамаандата (пенопластан, зубочисткаттан, 400 устуука биирдэ туттуллар ньуоскаттан улахан собо балык оҥорбуттар), II м. – администрация хамаандата (баҕа санааҕын толорор аптаах балыгы пластиковай бытыылкаттан табыгастаахтык кырааскалаан, уоттаах-күөстээх көрүҥнээн оҥорбуттар) уонна III м. – Хатырыктааҕы ВА (баайы-дуолу аҕалар дьикти балыгы шпагат быанан килиэйдээн, киэргэтэн, олус намчы оҥоһугу оҥорбуттар).

«Балыгы хабыы уопсай ыйааһына» диэн күрэххэ киин поликлиника хамаандата инники күөҥҥэ таҕыста, ыйааһын түмүгэ 1 киилэ 400 грамм. Иккиһинэн 600 грамм балыктаах терапевтическай көмө хамаандата, үсүһүнэн 200 грамм балыктаах суһал көмө хамаандата буоллулар. Ону сэргэ «Уоту оттууга» уонна «Буурунан муус үүттээһиҥҥэ» эмиэ киин поликлиника хамаандата чорбойдо.

Маны таһынан бэрт бэһиэлэй, киһи сүргэтин көтөҕөр хамаандалар икки ардыларыгар уп-улахан хаатыҥканан эстафета уонна мини-футбол күрэхтэрэ ыытылыннылар.

Уопсай түмүк маннык буолла: I миэстэ – киин поликлиника, II миэстэ – терапевтическай көмө хамаандата, III миэстэ – суһал көмө хамаандата буоллулар.

Үлэһиттэр маннык тэрээһин коллективы түмэр, үлэттэн тэйитэн арыый да сынньатар, эти-хааны чэбдигирдэр сыаллааҕын бэлиэтээтилэр. Бары үөрэн-көтөн, дьиэлэригэр анал бириистэрин илии тутуурдаах, өттүк харалаах тарҕастылар.

 

#НамскаяЦРБ #Намскийулус #Намскийрайон #Намулууһа #Намнааҕыкиинбалыыһа #подледнаярыбалка #весна2022 #сандалсаас #балыктааһын #муусаннынанбалыктааһын

Решаем вместе
Не смогли записаться к врачу?