Медицина үлэһиттэрин Ыһыаҕа
Опубликовано: 13.06.2022 в 14:53

Модун Россия күнүгэр Медицина үлэһитин күнүн көрсө Саха АССР тэриллибитэ 100, уһулуччулаах государственнай уонна политическай деятель М.К. Аммосов төрөөбүтэ 125 уонна Ийэ сылларыгар аналлаах Нам улууһун киин балыыһа үлэһиттэрин Үрүҥ Тунах Ыһыаҕа тэрилиннэ.

Үрүҥ халааттаах аанньалларбыт, балыыһа бары отделениелара түһүлгэлэрин тэринэн, симээн, сандалыларын сахалыы ыһыах аһынан-үөлүнэн хоточчу тардан бэлэмнэммиттэр.

Саха сиэринэн Үрдүк Айыылартан көрдөһөн, Хатан Тэмиэрийэҕэ уохтаах кымыһынан, арыылаах алаадьынан айах тутан, Виталий Очиров алгыс сиэрин-туомун толорон ыһыаҕы арыйда. Ол кэнниттэн түһүлгэ киэргэтиитин күрэҕэ ыытылынна.

Күн иккис аҥарыгар сайын кэлбитинэн бэйэлэрин эҕэрдэлэрин тиэртилэр: улуус кылаабынай бырааһа Ариан Сергеев, улуус баһылыга Юрий Слепцов, Ленскэй нэһилиэк баһылыга Петр Сокольников. Доруобуйа харыстабылыгар эҥкилэ суох үлэлээбит, үлэлии сылдьар үлэһиттэри чиэстээтилэр, үрдүк наҕараадалары туттартаатылар.

Салгыы отделениелар бэйэлэрэ бэлэмнээбит эҕэрдэ нүөмэрдэрин көрдөрдүлэр. Ол кэнниттэн «Боотурдар оонньуулара», «Саха Далбар хотуна», саха төрүт оонньууларыгар турнир, «Көҥүл оһуохай», о.д.а. араас куонкурустар ыытылыннылар.

Ити курдук, хас биирдии киһи доруобуйатыгар кыһаллар, күн-түүн мөхсөр, ытыктыыр, убаастыыр үлэһиттэрбит мустан, сайыны көрсө, дуоһуйа ыһыахтаатылар. Ыһыах тэрээһинэ киин балыыһа идэлээх сойууһа үлэлээбитин түмүгэр бэрт сэргэхтик ааста.

Решаем вместе
Не смогли записаться к врачу?