Иккис ийэ тэҥэ — оҕо бырааһа Любовь Зырянова
Опубликовано: 18.12.2021 в 16:41

Үрүҥ халааттаах аанньал буолуу элбэх сыраны, тулууру, кытаанах санааны эрэйэр. Оттон оҕо бырааһа икки бүк төгүл эппиэтинэстээх диэтэхпитинэ бука сыыспаппыт буолуо. Тугу баҕарарын, туга ыалдьарын эппэт киһичээни көрөр-истэр, эмтиир – бу улахан үлэ. Кыра киһичээн ийэтин кэнниттэн көрөр иккис киһитинэн педиатр быраас буолар.

Биир маннык идэлээх Намнааҕы киин балыыһа педиатрия отделениетыгар 20-тэн тахса сыл эҥкилэ суох үлэлээбит, билигин даҕаны үлэлии-хамсыы сылдьар киһинэн Любовь Валентиновна Зырянова буолар.

Кини Сунтаар Күндэйэтиттэн төрүттээх. Ньурба Убайааныгар оскуоланы ситиһиилээхтик бүтэрэн, Саха государственнай университетыгар медицина институтугар туттарсан киирэр. «Оҕо сылдьан быраас буолуом дии санаабат этим», — диэн ахтар. Ол эрэн биэлсэр ийэлээх буолан, кини сүбэтинэн-аматынан быраас буоларга сананар.

Институту ситиһиилээхтик үөрэнэн бүтэрэн баран, 1995 сыллаахтан ыла Нам улууһун киин балыыһатыгар педиатр бырааһынан ананан билиҥҥээҥҥэ диэри үлэлии-хамсыы сылдьар. Любовь Валентиновна аҕыйах ыйытыкка бу курдук хоруйдаата:

— 25 сыл бэриниилээхтик үлэлээн кэллиҥ. Урукку уонна билиҥҥи кэм уратылара туохханый?

— Урукку уонна билиҥҥи кэми тэҥнээтэххэ, биллэн турар, олус уратылаах. Урут эмтииргэ арыый да судургу эбит буоллаҕына, билигин кумааҕы үлэтэ олус элбээн элбэх быраас бириэмэтин сиир.

— Кырачааннары кытта үлэлиир уустук дьыала буолуо. Хас биирдии оҕо, төрөппүт ураты сыһыан эрэйэллэрэ саарбаҕа суох. Уонна оттон оҕолор үрүҥ халааттаах аанньаллартан куттаналлара баар суол. Оннукка бэйэҥ туох эмит кистэлэҥ ньымалааххын дуо?

— Бу диэн оннук кистэлэҥ ньыма суох. Син биир хас биирдии төрөппүккэ, оҕоҕо ураты болҕомто ууруллар. Ханнык баҕарар пациеннары биирдик, тэҥник эмтиибит, көрөбүт-истэбит.

— Оҕо отделениетын сэбиэдиссэйинэн хаһааҥҥыттан үлэлиигин? Үлэлиир кэмҥэр буолбут умнуллубат биир эмит түгэни ахтан ааһыаҥ дуо?

— Оҕо отделениетыгар үөрэхпин бүтэриэхпиттэн үлэлиибин. Оттон 2007 сыллаахха отделение сэбиэдиссэйинэн анаммытым. Саамай өйдүүр, умнуллубат түгэним диэн Нам улууһугар бастакынан ИВЛ аппараакка саҥа төрөөбүт оҕону тыыннаран быыһаабыппыт.

— Уустук үлэҥ быыһыгар сөбүлээн тугунан дьарыктанаҕын?

— Төһө да бириэмэ суох курдук буоллар, дьиэ кэргэммин кытары айылҕаҕа сылдьарбытын олус сөбүлүүбүт. Хайаан да онно анаан бириэмэ була сатыыбыт.

— Кылгастык дьиэ кэргэниҥ туһунан.

— Кэргэннээхпин, үс оҕолоохпун, биир сиэннээхпин.

Бу курдук үрдүк квалификациялаах быраас, Российскай Федерация доруобуйа харыстабылын туйгуна Любовь Валентиновна сыралаах үлэтин быыһыгар биһиги ыйытыыларбытыгар хоруйдаабытыгар махталбытын тиэрдэбит.

Үлэҥ сыаналанан Российскай Федерация доруобуйа харыстабылын миниистирэ Михаил Мурашко аатыттан Бочуотунай грамота туппуккунан уонна аанньалыҥ күнүнэн Намнааҕы киин балыыһа бары коллективын аатыттан ис сүрэхпититтэн истиҥник эҕэрдэлиибит! Баҕарабыт чэгиэн доруобуйаны, үгүс түбүктээх үлэҕэр үтүө түмүктэри, үрдүк ситиһиилэри, тус бэйэҕэр нус-хас, дьоллоох-соргулаах олоҕу!

Решаем вместе
Не смогли записаться к врачу?