Федор Порфирьевич сырдык кэриэһигэр
Опубликовано: 12.11.2021 в 13:03

Күн-дьыл ааһара түргэнэ…

Ааспыт кэминэн суруйар ыарахана…

Убаастыыр, ытыктыыр киһибит, истиҥ коллегабыт, Саха республикатын доруобуйа харыстабылын туйгуна, үрдүк категориялаах терапевт быраас Федор Порфирьевич Протопопов биһиги кэккэбититтэн туораабыта алтынньы 20 күнүгэр номнуо биир сылын туолбута. Оттон бүгүн, сэтинньи 12 күнүгэр, төрөөбүт күнэ.

Уус Алдантан төрүттээх Федор Порфирьевич Нам улууһун иккис дойду оҥостон, 1989-1993 сс. «Суһал көмө» салаатыгар, 1994-1996 сс. уонна 2011-2014 сс. Партизаннааҕы врачебнай амбулаторияҕа олус таһаарыылаахтык үлэлээбитэ. Олоҕун тиһэх күннэригэр диэри Иккис Хомустаах нэһилиэгэр үлэлээбитэ.

Федор Порфирьевиһы үлэлиир коллектива айылҕаттан ананан кэлбит эмчит быһыытынан билинэллэрэ. Кырдьык даҕаны, кини киэҥ билиилээх, бэйэтин идэтин толору баһылаабыт эмчит этэ. «Суһал көмө» салаатыгар үлэлээбит кэмнэригэр сүрэх, тымыр ыарыыларын хайысхатыгар уһулуччу билиилээҕин бэлиэтээбиттэрэ, элбэххэ үөрэппитэ-такайбыт, аҥардас ыарыы хартыынатыттан сөптөөх диагноз туруорара диэн ахталлар.

Оттон Партизаҥҥа үлэлиир кэмигэр эмиэ сүҥкэн үлэни ыыппыта. Ол курдук, Партизаҥҥа саҥа участковай балыыһа дьиэтэ аһыллан үлэҕэ киириитигэр улахан өҥөлөөх. Ити иннинэ Партизаҥҥа ФАП эрэ баара. Саҥа балыыһа материальнай базата бөҕөргүүрүн, саҥа медицинскэй оборудование, миэбэл, иһит-хомуос, таҥас-сап хааччыллыытын күүскэ туруорсан элбэхтик сүүрбүтэ-көппүтэ. Балыыһа дьиэтэ аҥара 16 куойкалаах стационар, аҥара амбулатория этэ. Элбэх үлэ миэстэтэ тахсан, дьон доруобуйатын туһугар үлэ түүннэри-күнүстэри барара. Онон Партизан балыыһата саҥа участковай балыыһа буолан үлэлииригэр бастакы быраас – Федор Порфирьевич буолар. Кини сырата улахан, муҥура суох элбэх. 2011 сыллаахха балыыһа врачебнай амбулатория буолан турара. 2010 сыллаах халаан уутун кэннэ улаханнык эмсэҕэлээн турар кэмэ этэ. Балыыһа дьиэтэ өрөмүөннэнэн турара эрээри, элбэх докумуон, медицинскэй каарталар, сурунааллар барыта ууга бараннар, ону чөлүгэр түһэриигэ улахан үлэни ыыппыта, саҥалыы оҥоһуллалларын ирдээбитэ, күүскэ үлэлэспитэ.

Күндү коллегабыт киһи быһыытынан олус элэккэй, сэмэй, көнө, наҕыл майгылаах, ол эрэн ирдэбиллээх сыһыаннааҕа. Ис-иһиттэн ыраас, чэнчис этэ. Медицина эйгэтигэр уһуннук үлэлээбит буолан, улахан уопуттаах быраас этэ. Тутатына сөптөөх диагноз туруоран, эмин табара, сөпкө сүбэлиирэ. Онон ыарыһахтар, эмтэнээччилэр түргэнник үтүөрэн үөрэн-көтөн тахсаллара, махталларын этэллэрэ.

Федор Порфирьевич үлэтин быыһыгар общественнай олоххо көхтөөхтүк кыттара. Ол курдук, нэһилиэккэ ыытыллар фестивалларга хорга, хоһоон ааҕыытыгар өрүү кыттара, коллективын кытыннарара. Ыһыахтарга эмиэ көхтөөхтүк кытыннарара, тэбис-тэҥҥэ сылдьыһара.

Кини олоҕун оҕолоро салҕыыллар… Улахан кыыһа кини туйаҕын хатаран, республикаҕа биллэр быраас, кыра кыыһа – следователь.

Федор Порфирьевич доруобуйа харыстабылын эйгэтигэр ис сүрэҕиттэн бэриниилээхтик, таһаарыылаахтык, хайа да сиргэ, хайа да балыыһаҕа үлэлээн, элбэх ыарыһаҕы эмтээн, өлөр өлүүттэн быыһаан, бар дьон дириҥ ытыктабылын, махталын ылыан ылбыта. Эдэр быраастарга үтүө холобур, сүбэһит, үлэтин баай уопутуттан сүбэлиир наставник буолбута.

Үрдүк билиилээх, үлэтигэр бэриниилээх эмчити кытта бииргэ алтыһан үлэлээбит кэмнэрбитинэн киэн туттабыт. Өйбүтүгэр, сүрэхпитигэр өрүү тыыннаах.

Решаем вместе
Не смогли записаться к врачу?