Нам улууһун ветеран эмчиттэрэ сыл бэлиэтин оҥордулар
Опубликовано: 04.06.2021 в 17:14

2021 с. Саха республикатыгар Доруобуйа сылынан биллэриллибитэ. Сылы бигэргэтэн, экспертэр быһаарыыларынан, сыл бэлиэтэ оҥоһуллубута.

Биһиги ветеран эмчиттэрбит мантан туора турбакка, Доруобуйа сылын өйөөн, Эмчиттэр күннэригэр анаан сыл бэлиэтин оҥоруутугар «Символ года здоровья в РС(Я)» диэн күрэх ыыттылар. Бу тэрээһини Намнааҕы киин балыыһа дьаһалтата уонна бэтэрээннэрин сэбиэтэ иилээн-саҕалаан ыыттылар.

Дьүүллүүр сүбэ председателинэн Намнааҕы оҕо искусствотын оскуолатын уус-уран кылааһын преподавателэ, отделение методиһа, СӨ культуратын туйгуна Ксения Колодезникова үлэлээтэ. Күрэххэ 19 кыттааччыттан 22 үлэ киирдэ. Биһиги эмчиттэрбит талааннарынан өссө төгүл сөхтөрдүлэр. Үлэлэр араас көрүҥүнэн оҥоһуллубуттар.

Ол курдук, кыайыылаахтарынан буоллулар: «Кыбытык тигии» — Т.И. Москвитина, «Лазерынан быһыы» — С.Е. Петрова, «Валяние» — Т.Г. Константинова, «Оҕуруонан тигии» — М.П. Федорова, «Витраж» — М.Е. Протопопова, «Кумааҕынан пластика» — М.С. Ачикасова, «Быысапка» — С.П. Былкова, «Маллаах иһит» — Т.П. Скрябина, «Алмазнай мозаика» — В.В. Попова, «Точечнай роспись» — А.М. Николаева, «Комбинированнай аппликация» — П.И. Куличкина. Күрэх кыттыылаахтара бары сертификатынан наҕараадаланыахтара.

Улахан махталбытын биллэрэн туран, бу күрэх спонсордарын билиһиннэрэбит: «Алтан» атыы-эргиэн киинэ (С.Р. Дьячковская), «Нива+» (Н.Е. Молчанова), «Оптика галерея очков» (А.А. Уварова), ИП Л.Г. Рехлясова, «Эркин» (С.Ю. Дохунаев), «Милана» (М.Н. Тарская), «Ювелирный салон мастерская» С.Р. Федоров, «Ткани» (Е.С. Викторова), «Уран саргы» (В.В. Суздалова), «Золотая аура» (А.И. Ефимова), «Оһуор» (Л.В. Собакина), «Хозмаркет» (О.С. Громов) маҕаһыыннар уонна Намнааҕы киин балыыһа бэтэрээннэрин сэбиэтэ.

Эмчит бэтэрээннэр үлэлэрин быыстапкаларын туруорарга күүс-көмө буолбут оҕо модельнай библиотекатын сэбиэдиссэйэ Варвара Бережневаҕа итии-истиҥ махталбытын тиэрдэбит. Дьүүллүүр сүбэ быһаарыытынан түөрт үлэ талыллан, Намнааҕы киин балыыһа дьаһалтатыгар уонна поликлиникаҕа бэлэх уунуллуоҕа.

Маны таһынан, Намнааҕы киин балыыһа бэтэрээннэрин күүһүнэн (предс. В.В. Попова, С.И. Осипова, З.А. Герасимова) «Как молоды мы были» диэн урукку сыллар хаартыскаларынан быыстапка куйаар ситимин нөҥүө ыытылынна. Быыстапкаҕа өр сылларга медицинэ эйгэтигэр олохторун анаабыт доруобуйа харыстабылын туйгуннара, бочуоттаах донордар, 50-тэн үөһэ саастаах бэтэрээннэрбит бэйэлэрин архыыптарыттан хаартыскаларынан көхтөөх кыттыыны ыллылар. Быыстапка Намнааҕы оҕо модельнай библиотекатыгар турда.

Куйаар ситимин нөҥүө ыытыллыбыт хаартыска быыстапкатын тэрийиитигэр күүстээх көмө буолбут Намнааҕы оҕо модельнай бибилиотека сэбиэдиссэйэ Варвара Бережнёваҕа барҕа махталбытын тиэрдэбит!

Үрүҥ халааттаах аанньалларбытын бука барыларын самаан сайын кэлбитинэн уонна Эмчиттэр күннэринэн итиитик-истиҥник эҕэрдэлээн туран, баҕарабыт кытаанах доруобуйаны уонна уһун, дьоллоох олоҕу!

Решаем вместе
Не смогли записаться к врачу?